SKMB’s Linggo ng Kabataan Commemoration

Isinagawa ng Sangguniang Kabataan ng Matandang Balara (SKMB) ang SKMB’s Linggo ng Kabataan Commemoration kasabay no'ng August 30 - September 1, bilang isang inisyatibang naglalayong pagsama-samahin ang mga organisasyong pangkabataan, mga boluntaryo, lokal na negosyo, at iba’t ibang sektor ng komunidad sa iisang espasyo ng pakikipag-ugnayan at pakikilahok. Sa loob ng tatlong araw, nagsilbi itong plataporma para sa pagpapakilala ng mga organisasyon at kanilang mga adbokasiya, habang nagbibigay rin ng pagkakataon sa mga kabataan na matuto, makiisa, at makahanap ng mga grupong maaari nilang maging bahagi.

Sa pamamagitan ng interaktibong aktibidad, naipakita ng mga youth organizations ang kanilang mga programa, proyekto, at serbisyong nakatuon sa pagpapaunlad ng kabataan. Naging daan din ang programa upang mapalawak ang ugnayan ng mga organisasyon at boluntaryo, makapagbahagi ng mga karanasan, at makabuo ng mga bagong oportunidad para sa kolaborasyon at sama-samang pagkilos sa komunidad. Higit sa lahat, nabigyang-diin ang kahalagahan ng bolunterismo, pamumuno, at aktibong pakikilahok bilang mahalagang bahagi ng paghubog ng responsableng mamamayan.

Kasabay nito, nabigyan rin ng pagkakataon ang mga lokal na negosyante, concessionaires, at mga kabataang alagad ng sining na maipakita ang kanilang mga produkto, serbisyo, at talento sa mas malawak na komunidad. Hindi lamang ito nakatulong sa pagpapalawak ng kanilang network at pagkilala sa kanilang mga gawain, kundi naging daan din upang hikayatin ang suporta ng komunidad sa mga lokal na inisyatiba at kabataang may potensyal sa larangan ng sining at pagnenegosyo.

Naging matagumpay ang SKMB Community Fair sa pagtataguyod ng pagkakaisa, pakikipagkapuwa, at aktibong partisipasyon ng kabataan. Nagsilbi itong makabuluhang espasyo kung saan nagtagpo ang iba’t ibang sektor upang magbahagi ng kaalaman, magsulong ng mga adbokasiya, at magtulungan tungo sa iisang layunin—ang paghubog ng mga kabataang may malasakit, kakayahan, at kahandaang maging katuwang sa patuloy na pagpapaunlad ng Barangay Matandang Balara.